قلم رصاص وذهن صافي وبراية ••• ثورة مشاعر حقيقية ومسودة تحلق بهاجسك وتحقق الغاية ••• لا صار لك من كتابات الشعر مدة ... طولت صمتي وبعض الناس حكاية ••• واسرجت خيل الكلام وجات من حده يشبهني الذيب يا ليلي في مسرايا ••• ويشبهني البحر في جزره وفي مده اقرا حديث النبي وأفسر الآية ••• والعمر محدود والأيام ممتدة وانا بشر في مسافات الزمن تايه ••• لا هو بقد الزمن ولا الزمن قده يطمح ولده يتسلم بعده الراية ••• مثل ما ابوه استلم من بعد جده عسى ايديني لقصر العز بنايه ••• وتردع ايادي حسود ناوي هده اهل الرخى في الشدايد تبغي عناية ••• واهل الشدايد توقف ساعة الشدة تلهيني النفس لآن النفس لهاية ••• وتصد وانا رجل ما يعرف الصدة والصد بين الحبايب أكبر دعاية ••• تودي القلب لأقصى الحزن وترده والغالي اللي غرامه يسكن حشايه ••• الى الحين وانا متيم فيه واوده لا قام يعزف من لحون الهجر نايه ••• عساه يمزح معي لا يكون من جده لا قال لي وش تقول في لون حنايه ••• اقول يا كبر حظه محدٍ قده وشلون ارضيه لو ما دور رضايه ••• واحساسي بصدق عكس احساسه بشده احس انه سبايب بسمة شفايه ••• ويحس باني سبب دمعه على خده