ابقى ياضل ياشموس غطى المساحات بالوضوح استنهضى الشوق الجلوس ...وهجك شوارع ذاتى فى ليل اليباب ماتخافى من دم الغروب لو رتش اللوحة الضباب مادام ضميرنا الفينا حى مادام عريق العشق حى ملحوقة يامدن السراب ماتشفقى العطش الرحيل النيل ركيز ودمعة الاحباب سحاب فيضان عمار اتربعى وفجى الوجع دمع الالام.....مايدفقك ماخاب غناك فارسك رجع اتوهجى وانتى الشمس اتلهجى ونورك سطع نور بوادينا الكساح لاقصت مزامير الصباح مبكية قرية وقنبلة متكية دمعة وسنبلة الليلة فى ايدنا السلاح ريشة وكدنكة ومطرقة نبنيكى احسن ياظروف مخضرة دانية القطوف نطوى المسافات نسبقا ادفقى بلدك فداك اتوهطى ورى البنيات العديل محمية بى عرق الترابلة ونغمتك مسقية بالريد العتيق انغام ربابتك تشيل معزوفة الريد والرفيق ماتصغرى تكبر امانى السنبلة هى اكبرى تصغر معانى القنبلة ماتصغرى ماترجعى الصد للمداين والفرى شيلى الشحوب والاصفرار ادى البويتات منظرا ادفقى فى كل شارع وكل بيت وفى ضمايرنا السهول ادفقى فى كل حتة وكل زول ابقى شان تبقى الفصول