مقادير يازمن واحكام هناء واحلام شقا وآلام ...غنيوات البلد مرقت مجرتقة بدعاء الأُمات وبنوت السعد شالن نقاقير العشم مارقات وحلم الزينة بت الشوق ينادي على عشا البايتات وهي لا عارفة الزمن دوار ولا عارفة السنين قاسيات والصاليهو لهب الغي فوق احزانو ضارب الصي لا خابر السفر لاوين ولاحاريلو جغمة ري من البلد المعبا جروح ينازع الروح وما لاقيلو بهرة ضى وياهو الحال زغاريدا تسوى السي وتاني تسوي اوب واحي واكيد يامشرع السمحات اكيد تمطر اذا سحب الخريف شايلات واكيد تزهر شتيلات المنى الذابلات واكيد تبسم باذن الله بروق القبلى للسارحات وتانى تفرهد القمحة وتعود الضحكة للسمحة ويبقى عشمنا في الجايات