نديم الوله، عاد السراب، ورحَل تشرين ولا زلت بك مولع، ولا زلت بك لاهي وعودك على أرصفة إنتظاري غصن نسرين ...يلاعب ورَقها نسمة ظْنوني، وآهي مشاويرك أبدَى، وأنت أحَقّ بـ ضياعي ليَن تدلّ الخطى لك تايهٍ فيك متباهي جهلت الطريق منين يبدا معك ولوين يا فصلٍ تفاصيله مع سجّة الساهي قصورك كمال ، وغيبتك ما لها تخمين عن اسمن عذر يطِفي الزعل عذرك الواهي نديم الوله، عاد السراب، ورحَل تشرين ولا زلت بك مولع، ولا زلت بك لاهي عرفت الظمى قبلك وبعدك عرفته زين يواسي جفاف العود بعدك ظمى فاهي وأدوّر عليك وما على الأرض منْك ثنين والى الحين (أحبك) تنتظر جرأة شفاهي كثر ما خذا وجهك هداوة، وعودك ليِن؛ يدك ليه ما تاخذ من إحساسك الراهي عطتني يدينك من عرفتك عدل جرحين اسولف بها مع ذكرياتك وانا فاهي وانا ما عطيتك غير وردة وسبع سنين قليلة لكن والله ما عندي الا هي نديم الوله، عاد السراب، ورحَل تشرين ولا زلت بك مولع، ولا زلت بك لاهي