سامح الله طرقةٍ جابت على دلعونه ضيَّقت صدر الغريب اللي يعد ايامه يوم سرى موتره تكى على طبلونه ...كن قلبه نايشه مخلب فديغ الهامه الطريق اللي يودي ديرته وشلونه جعل يسقيها السحاب اللي يضف ركامه جعل يسقيها السحاب اللي يضف ركامه ما سريت الليل كله غير لجل عيونه ودي أحرر خيالي واستثير الهامه واتمثنى حيهم وتخف رجلي دونه واستحي من شرهة النقاد واللوامه حتى لو عذري كبير وعارفٍ مضمونه بيتهم والله يا دوب تمر من قدامه بيتهم والله يا دوب تمر من قدامه عندهم بنتٍ فروع وناقتن مزيونه وبلشوا من كثرت الخطاب والسوامه ردهم من دونها عودٍ على حاجونه من غلاها ما يقلدها بغير عمامه تلتهب مثل إلتهاب الصلفه المعنونه في ملز الخيل راحت شدتين وقامه تلبس الثوب الحرير اللي يضف ردونه ما عرض في السوق كله منه ولا خامه من غلاوة قيمته يبطون ما يشرونه ما يليق الا على عنق الظبي والقامه الغزال اللي مثل جنح الظلام قرونه لا انثعل جاب العبير اللي تهب انسامه لا انثعل جاب العبير اللي تهب انسامه فارقه ربي سوات الدره المكنونه جعل تلعات العذارى فدوةٍ لقدامه ودي امشي عند شفه لا تخيب ضنونه مير يردعني هوى الطيّب عزيز الهامه علموه ان الوعود الساميه مقرونه لا يقفي والجفا راعيه في دوامه لا يقفي والجفا راعيه في دوامه