ياملامح وجهك اللي ماني مصدقها كيف هذا الوجه خلاني اكذب عيني ...اسمحي لي لو اناظرها خفاء واسرقها ودي من ماشفت من وقتي اسدد ديني كن وجهك جاي لشعوري يبي يفيّقها من سباتً كنت اظنه دايماً روتيني ياتفاصيلً يسابق رعدها بارقها واستهلت لين جات من العدم تحييني ياامنيه ماكنت اظن ان الزمن حققها وياسحابه ماهقيت من الظما ترويني كل ذكرى مااجمعتني بك ابي تحرقها وكل لحظه مااجمعتني فيك ماتعنيني ذوقيني فرحة الدنيا وقولي ذقها عقب ماذقته من الدنيا طوال سنيني ريحي روحً مع دروب الهوى مرهقها ومن جروح العالم اللي ماوفوا داويني علميني كلمة احبك وكيف انطقها وكان مامت بشرايينك غلا خليني الحياه اللي يجاملها على منطقها راح عمره بين وينك ياهناي وويني غيّري الدنيا من المغرب الى مشرقها حتى اسمي لو مايرضي خاطرك سميني قلبي اللي كلبوا اماله معك علقها بعد ماجاء في يدك والله ماعاد يجيني