196: ورطة إجتماعية إلكترونية كبيرة

ضيفة الحلقة [ نور الخضراء ]

كلنا نستخدم برامج شبكات التواصل الاجتماعي بشكل يومي… وأحياناً كمان تكون أول شيء نسويه من يوم مانفتح عيوننا في الصباح. ولما نجي نفكر فيها نحس انه الموضوع قلب إدمان! والمشكله إننا أكتشفنا إن هذه البرامج صممت عشان تخلينا ندمنها

بعد ما شفنا فيلم وثائقي إسمه (ذا سوشال ديليما) وتقدروا تشوفوه على نتفلكس… صعقنا من الكلام إللي سمعناه لدرجة إننا كان لازم نجي على الاستديو ونتحاور في الموضوع! وشاركنا اليوم في الحوار صديقتنا الدافورة نور الخضراء.

ضيفتنا اليوم رائدة أعمال سعودية في المجال التكنولوجي ومحبة لألعاب الفيديو لدرجة إنها درسة المجال وصارت اليوم مو بس تلعب ألعاب الفيديو… كمان صارت تصممها! ودرست نور هذا المجال بين سان فرانسيسكو في الولايات المتحدة، والعاصمة البريطانية لندن. وكمان درست الماجيستير في التكنولوجيا وريادة الأعمال في لندن، وبعدها أسست شركة تختص في العمل بين تطبيقات الاتصالات وألعاب الفيديو.

وزي ما وعدناكم الحلقة اللي راحت اليوم نعلن عن أول فائز بصندوق تستاهل مع مستدفر… أو بالأصح فائزة وهي مستمعتنا الدافورة راوية مغربي.

وصراحة الصندوق كان المفترض يكون مليان سناكس ”تفاريح“ تتسلوا بها لمن تسمعوا حلقة مستدفر لكن حسينا انه السناكس لوحدها مو كفاية… فأتواصلنا مع أصحابنا الرهيبين في ”كون“ وأرسلوا لنا شوية هدايا نحطها في الصندوق كمان وأكيد حتعجبكم.  تقدروا تتابعوا حساب كون على انستجرام kawn.a@ … عندهم منتجات بتصاميم رهيبة من بروشات لسلاسل مفاتيح و ستيكرز وتقاويم وأشياء ثانية كثير اللي ممكن تشتروها من حسابهم بشكل مباشر.

وإذا حابين تشاركوا معانا في السحب على الأربعة الصناديق الباقية من تستاهل مع مستدفر… تقدروا تسجلوا معلوماتكم على الرابط ( testahelbox.com/ ) ولا تنسوا تستخدموا الكود الخاص واللي هو كلمة (مستدفر) بالعربي عشان تدخلوا السحب.